युवकांचा देश… जगातील सर्वात जास्त संख्येने युवक जेथे राहतात तो देश म्हणजे भारत..‌. लोकसंख्येच्या सुमारे 70 % म्हणजे जवळपास 98 ते 100 कोटी लोक हे 15 ते 40 वयोगटातील आहेत. त्यातील तब्बल 42 कोटी 15 ते 29 वयोगटातील आणि 92 कोटी 15 ते 35 वयोगटातील आहेत.  ही एक फार मोठी शक्ती आहे. मात्र या युवकांच्या क्षमता विकसित करण्यासाठी सध्याच्या शिक्षण पद्धतीमध्ये कोणतीही व्यवस्था उपलब्ध नाही. भारतातील सध्याची शिक्षण व्यवस्था ही गुलाम आणि नोकर बनवणारी बनलेली आहे. एकूण विद्यार्थी संख्येच्या ४ ते ५ टक्के विद्यार्थ्यांना सोडले तर इतरांचे पुढे काय होते ते कोणालाही कळत नाही आणि कोणालाही त्याची पर्वा नाही. आजचे समाजकारण, राजकारण, साहित्य, संस्कृती ही सगळी क्षेत्रे युवकांपासून दुरावलेली आहे. युवकांना काय हवे, त्यांच्या अपेक्षा काय आहेत, त्यांना कसे भविष्य घडवायचे आहे, त्याबाबत मार्गदर्शन करणारी, प्रशिक्षण देणारी, कोणतीही व्यवस्था नाही. सर्व काही राम भरोसे चाललेले आहे. अशावेळी युवा विद्या अर्थात युथ डेव्हलपमेंट प्रशिक्षण हा अतिशय महत्त्वाचा मुद्दा आहे. करोडो युवकांना प्रशिक्षित करणे, त्यांच्या वैयक्तिक जीवनासाठी आणि देशाच्या प्रगतीसाठी अत्यंत आवश्यक आहे. सोशल मीडिया, इंटरनेट, गळेकापू स्पर्धा, कमी होणाऱ्या नोकऱ्या, बेरोजगारी, ए. आय. चे संकट, हवामानातील बदल, स्वैराचाराला आमंत्रण देणारे अभिव्यक्ती स्वातंत्र्य, मादक पदार्थे व अन्य व्यसने, ढासळती कुटुंब व्यवस्था, वाढती लोकसंख्या, इ. अनेक आव्हानांनी युवा पिढी समोर आत्यांतिक संघर्षाची स्थिती निर्माण केली आहे. आपला जन्म का आणि कशासाठी झाला आहे, जीवनाचा अर्थ काय, जीवनाचे ध्येय काय, मैत्री, नातेसंबंध,  आर्थिक स्थिरता,  आरोग्य, इ. गोष्टींनी तो सैरभैर झालेला आहे. अशावेळी तारुण्य म्हणजे काय ? तारुण्याचा विकास कसा करायचा? तारुण्याचे रहस्य कोणते ? तारुण्यातील विविध ऊर्जा कशा चॅनेलाइज करायच्या, करिअर म्हणजे नक्की काय ? शिक्षण आणि कौशल्ये यांचे समायोजन, आरोग्याची काळजी, लैंगिक ज्ञान म्हणजे तारुण्य भान, जीवनमूल्ये आणि आदर्श, विवाह आणि गृहस्थाश्रम, आर्थिक समृद्धी, इ. अनेक गोष्टींवर त्याला प्रशिक्षित करणे अतिशय आवश्यक आहे. भारतातील सर्व युवक, मुले आणि मुली हे आपल्याचा कुटुंबाचा एक भाग असून त्यांना युवा विद्या शिकवणे, त्यांच्या शारीरिक, मानसिक, सामाजिक, बौद्धिक, कौशल्याच्या, सांस्कृतिक, भावनिक क्षमता विकसित करणे हे अतिशय आवश्यक आहे.युवकांना सामर्थ्यंशाली बनवणे, त्यांच्यातील विविध क्षमता विकसित करणे आणि त्यांनी वैयक्तिक जीवनात यशस्वी होणे यासाठी युवा विद्या शिकवली पाहिजे. त्यासाठी लाखो युवा विद्या  प्रशिक्षक. - युथ डेव्हलपमेंट कोच यांची गरज आहे. त्यासाठीच हा अभ्यासक्रम तयार केला आहे.